Sermon Kolose 3:12-14

Sermon Parhalado HKBP Ressort Helvetia Medan Jumat, 25 Oktober 2013 MARPARANGE NA DENGGAN DI BAGASAN TUHAN I Kolose 3:12-14 I. PATUJOLO Kolose sada huta na di luat Asia. Ro do si Paulus tu huta Kolose mamaritahon barita nauli (ida Ul. Ap. 19:10). Manongos surat ma muse si Paulus tu huria Kolose laho manogunogu nasida asa lam denggan ngolu ni partondion, parrohaon dohot parange nasida mangihuthon dohot manghaporseai Tuhan Jesus kristus. Ganup angka na porseai naeng togu jala marsihohot marhaporseaon tu Jesus Kristus. Dihatahon si Paulus, injil ni kristus do panghirimon tu hangoluan na di surgo, jala dipatau Debata do saluhut angka pardosa asa parsidohot do di harajaon ni Debata marhite haporseaonna. Barita nauli ni Kristus ido na paluahon jolma sian haholomon dohot hadosaon jala dilehon haluaon marhite hasesaan ni dosa. Di bagasan Kristus do i sude dipatupa Debata, di hau pinorsilang i bahen pardamean ni jolma tu Debata. II. IMPOLA NI TURPUK Di bagasan turpuk on godang do angka mutiha partondion na pinasahat dohot na niondolhon ni Apostel Paulus. Alai sian angka na godang i, dibagi di bagasan dua bagian ma i na boi taida di toru on : 1. Bangso Naung Pinillit ni Debata : Di ayat 12a i dihatahon Ap. Paulus “Onpe, hamu angka naung pinillit ni Debata, angka na badia jala hinaholongan”. Dirajumi jala diparhatopot si Paulus do ia huria Kolose ima sada huria naung pinillit ni Debata. Marlapatan, ndada holan bangso Israel na tarpillit gabe bangso ni Debata, dohot do angka halak na adong di huta Kolose, naung gabe siihuthon Kristus, nasida pe bangso na pinillit jala na pinorbagiaan ni Debata do. Huria Kolose dipillit Debata gabe bagnsoNa, tontu marojahan do i sian panghophopon ni Tuhan Jesus Kristus, naung mate di hau pinorsilang, na mulak mangolu jala manaek tu banua ginjang. Kristus parhitean ni Debata mamilit angka bangso di duru ni Israel. Israel dipillit Debata asa gabe pasupasu tu saluhut bangso (1 Musa 12:3c), alai marhite Jesus Kristus dipillit Debata angka bangso gabe taruli haluaon dohot hangoluan salelengna. 2. Rumang ni Parange na denggan di bagasan Kristus : Di ayat 12b-14 dihatahon jala dipajojor si Paulus do disi rumang ni parange na denggan di bagasan Kristus, parange na patut sihangoluhonon ni angka halak Kristen, ima : a. Parange Parasinirohaon, ima ulaon holong na so marpambuat, holong na mamolin, holong na olo mangurupi angka na metmet, na pogos, na so margellok, angka na ginosagosa. Hangoluan ni jolma na adong di hasiangan on, ima ngolu di bagsab asi ni roha ni Debata. Debata nunga marasi ni roha tu ganup jolma, manesa dosa, patauhon manjalo haluaon. Hombar tusi ma ganup jolma naeng mangulahon ulaon asi ni roha tu saluhut jolma. b. Parange Habasaron, ima ulaon na basar, na burju manang na parpangurupi na so olo marnaloja. Sai ungkap do rohana mangurupi angka na patut, basar do ibana di angka sibahenon, ndand olo mangholit, jala ndang hea dipanghatahatahon, ditengatengahon dohot dihaginjangkon angka pangurupionna i. c. Parange Haserepon, ima parange na tongtong olo paoru diri, patoru roha, dao sian haginjangon ni roha, sabar di angka parungkilon, togu di parrohaon jala na tongtong mambahen sederhana ngoluna, nang pe sada halak namora jong ibana. d. Manghangoluhon Parange Halambohon, ima parange na patuduhon sikap na lembut, hohom jala teduh. Halambohonna mambaen sonang jala demak pangkilalaan. Di bindu 4:6 didok “sai tong ma lambok hatamuna songon na siniraan”. Marhite halambohon di panghataion dohot di parange gabe lambok do nang pangkilalaan ni na mambege dohot na jinumpanganna, manghorhon tu sonang ni roha. Halambohon ni roha jotjot mambahen teduh jala sejuk pangkilalaan. e. Parange Halambason, ima parange na paboahon hasirion ni sasahalak i na burju, digoari na lambas roha, na mansai maol doi muruk jala lambat tarrimas, ndang mura tarhasut, ndang penghasut, sada halak parbahulbahul na bolon, angka na tongam manghatahon hatana, jolma na sai marpanganju maradophon halak na sai jotjot mangulahon na sala. f. Parange na Masipauneunean, ima patuduhon sasahalak na olo masipatureturean, olo paturehon jala olo dipature. Ndang sai dipartahanhon hasintongan dohot habonaronna. Olo patalu roha jala sai mangutamahon hadengganon do halak na marparange na masipauneunean. Sai jumpa do dihadirion ni angka jolma sisongon i, roha na olo jala tau padengganhon angka na humurang i. g. Parange na Masisesaan Dosa, ima parange na olo memaafkan, mengampuni (mansesa), dohot manghalupahon angka na sala jala na hurang i. Angka jolma na olo masisesaan dosa, angka ido na mananda haluaon na pinasahat ni Tuhan jesus. Alai adong jala godang do jolma na so olo masisesaan dosa. h. Manghangoluhon Parange na Masihaholongan, ima parange na gabe pusat ni parange di hakristenon. Holong ni roha ido impola (mutiha) ni etika Kristen sekaligus ruhutruhut partondion. Di bagasan ulaon haholongon do jumpa sikap panghophopon songon na pinatupa ni Tuhan Jesus Kristus di na olo jala na rade rohaNa diparsilangkon, mate di hau pinarsilang i. Ulaon haholongon i do nang diparsinta mangolu di ganup angka na porsea di huria Kolose. III. IMPOLA SIPAHUSORHUSORON 1. Tapahusorhusor jumolo, ise do hita? Tontu marhite haroro ni Tuhan Jesus Kristus dohot panaonon nang panghophopon. Na di hau pinarsilang, gabe dipatau do hita bangso na tarpaillit, nunga parsidohot hita gabe bangso na badia, bangso haholongan, houm ni angka na porsea. Sian i taboto hita angka naung mian do di bagasan parsaoran tu Jesus Kristus. Panandaon di dirinta, ise do hita, tontu ditogihon hita naeng mananda holong ni Debata naung patauhon hita tu haluaon dohot hangoluan i. 2. Tapahusorhusor boha do parangenta? Marhite sian turpuk on ditogihon hita mangantusi dohot mamboto angka parange na patut sihangoluhononta di bagasan Tuhan i. Adong ualu parange na denggan jala na tama diulahonon, siradotan dohot siharingkothononta laho mangulahon i di ngolunta, di keluarganta, di parsaoranta dohot angka na asing pe. Parange na ualu i gabe ciri khas asli do i di hakristenon, na patut tarida di ganup hadirion ni angka ruas ni hurianang pangula (= angka na porsea di Tuhan Jesus Kristus). Parange na denggan i, ido parbue ni haporseaon tu Jesus Kristus, manang ido parbue ni Tondi Parbadia na mangolu dohot na mangula di bagasan hadirion ni angka na porsea i. Parange on ma nuaeng na ringkot sieahon ni sude angka na porsea, ala dirajumi roha do ndang sude dope halak Kristen olo mangulahonsa. Amen!